مکتبین بیرینجی گونو

یازار : هاماش

+0 به یه ن
اینقلاب اولاندان بیر ایکی ایل سونرا بیرینجی کیلاسدا درس اوخوماغا باشلامیشدیق. تورک اوشاغی اولدوغوموزا گوره فارسجا دانیشماق بیلمیردیک. سئوینیردیک کی درس اوخویوروق آللاه قویسا آدام اولاق. سحر تئزدن بیزی دوزدولر سیرایا، نابلد بیر دیلده بیر سؤزلر دئدیلر دوعادان سوروددان اوخوتدولار. بیزده ائله هردن یالاندان آغزیمیزی آچیب یوموردوق قوی دئسینلر بیزده بیرزادلار بیلیریک. هر حالدا بیزی گؤندردیلر کلاسلاردا هره نی اؤز یئرینده اوتورتدولار. بیر آز سونرا کلاسین قاپیسی آچیلدی، بیر قارا بوغلو بوی بوخونلو  چوخ یاراشیقلی بیر معللیم کیلاسا کئچدی. بیزه باخیب گوله گوله دئدی :اوشاقلار سالام! بیزده هئچ چوخوموز سالام وئرمه ییده باجارمیردیق،یاردیملاشدیق اونون جاوابین وئردیک. بیر آز کئف احوالدان سونرا معللیم باشلادی بیزدن بیر بیر آدیمیزی سوروشماغا. هه اوغول سنین آدین ندی؟ منده دئدیم جاببار! شؤهرتین ندی؟ باخدیم معللیمین اؤزونه. من نه بیلیم آخی شوهرت یانی نه. دئدیم ددیمن آدین سوروشسان عیسا دیر. سوروشا سوروشا گئتدی. بعضی لریده هله اوتاندیغیندان باشین سالیب آشاغی کؤینه گینین حوققولون چینه ییردی. دالیدا بیر اوروج آدیندا بیرینه نوبا یئتیشدی. معللیم اوندان سوروشدو: اوغول آدین ندی ؟ الینه دؤندیگیم د اوروج، بیردن باشلادی دانیشماغا: آغا اسمم اوروج هست، اسم پدرم جمشید! هامینین آغزی آچیلا قالدی٬ بیز دئدیک ایندی معللیم اونا بیر جایزه دن زاددان وئره جک بیزیم الیمیز بوشدا قالاجاق. معللیم  گولومسه ییب اوروجا دئدی: اوروج فارسی نی سنه کیم اویردیب؟ اروج گئنه اوجا سسله فارسجا سؤیله دی: بابام یاد داده! معللیم دئدی : اوروج تورکونو ده باشارارسان؟ اوروج قاییتدی دئدی: آغا بیر آز بلدم، اما پدرم دئییب فارسی مهمتره. معللیم چوخ سویوق قانلی دئدی:اوروج دده ن یانلیش ائله ییب تورکو فارسی دان اؤنملی دیر، اول اونو اؤیرن سونرا باشقا دیله کئچ.
دئییرم اوندا بیز آنلاسایدیق  عزیز اویرتمن نه دئییر ایندی بلکه گونوموز بو ده ییردی!