کولتور اوجاغی

یازار : هاماش

+0 به یه ن
اوستاد مورادی گؤزلوگون الینه آلیب اونو تمیزله یرکن فیکیر دوشونجه ایچینه جومانلار کیمی گؤرونوردو.  داییم قالایچی مورتوض اونون توکانینین اؤنونده خیاوانین او الینده بیر ایسلامی کولتور ائوی آچیبدیر. من ده اورا باش ویرماق اوچون مورادی معللیمین بیتیک ائوینین اؤنوندن کئچنده اونو او دورومدا گؤروب دؤندوم او ائل قایغیسی چکن اوستا یازارین دا کئفین سؤروشام.
ایچری کئچیب سالام وئریب کئف احوال ائدیب اگلشدیم. بیر آز حال هاوانی دگیشیم دئیه،  بیتیک ساتیشینین نه دورومدا اولدوغونو سوروشدوم.
بئله گئتسه بیتیک ائولری بیر بیر باغلاناجاق! بیتیک آلان یوخدو! بیتیک کیتاب اوخویان یوخدو!
 بو میللت بیتیک الینه آلانی لاغا قویوب گولورلر! کیتاب اوخوماغی سئچمه ین توپلوم یوخ اولماغی سئچیبدیر!
 بو سؤزلری منه آنلادان اوستا یازارین ندن دوشونجه یه جومدوغونو یاواش یاواش آنلاییردیم.
ایکیمیز دانیشارکان قالایچی داییمین کولتور ائوینین اؤنونده اولان اوزون قویروق دیققتیمزی چکیردی. کئفلی ایسکندر، دوکتور جئری، کل اوغلان و بیر چوخ بگلر، خاتینلار، اورا کئچمک اوچون گونون قاباغیندا قویروقدا گؤزله ییردیرلر. هر بارماقلاریندان مین باجاریق تؤکولن قالایچی داییم یاردیمجیلاری ایله بیرگه اورا کئچنلردن اون اون بئش مین تومن آلیب بیلیط وئریب اونلارا  اوتوراق یئری گؤستریردیرلر. سس صدالاری بوتون خیاوانی گؤتورموشدو. اورانی تانیماسایدیم ائله ساناردیم کی اوردا نذیر یئمگی یایلاییرلار.
ایسلام اؤلکه سینده بویا باشا چاتان شیخ قیلیقلی قالایچی داییم دده لیگی شیخ آغانین یاردیمی ایله ائله بیر کولتور ائوی یولا سالمیشدی کی آوروپادا، استانبولدا اولان دیسکولاری دا جیبینه قویموشدو. 
آنجاق قالایچی دایینین پارتی یوغون اولدوغونا گؤره اورانین آدین ایسلامی کولتور ائوی قویموشدو یوخسا ایسکندر عمی نین کولتور ائوی کیمی اورا دا «خانه فساد» آدی قویوب باغلاییب اؤزون ده داما سالیب شاللاق ووراردیلار.   اوستا  یازار مورادی معللیم گؤزلوگو گؤزونه ویریب بیر کیتاب آچیب اوخوماغا باشلامامیشدان منه دئدی: قالایچی دایین صیغا ایشینین ده بوگون ایزنین آلیب یولا سالیبدیر. بو گون بورا گل گئت نئچه قات اولوبدور. من دئییردیم بو گل گئدین چوخ اولماسی منیم ده بیتیک ساتیشیمی یاخشیلاشدیرار آنجاق هله کی گون اورتا اولوب من سیفته ائله مه میشم. گؤره سن اوخوماق بیلمک ندن بونلارا بو قدر چتین گلیر؟ 
بونلاری دئیندن سونرا کیتابی آچیب اوخوماغا باشلادی.
صیغا آدی گلندن دوزو ائله من ده بیتیک ائویندن چیخماغا بیر ندن آختاریردیم.
آیاغا قالخیب دئدیم:  ایزنینیزله گئدیم داییما یاردیم ائله ییم. صیغا ایشی  بو گون اورانین ایشلرین آغیرلاشدیریب!

جیبیمده چیرتما چالارکن اوستاد مورادی یه هله لیک دئییب قالایچی دایینین ایسلامی کولتور اوجاغینا دوغرو یولا دوشدوم.
هاماش خانکیشیلی




عزرائیلی کیم اؤلدوره جک؟

یازار : هاماش

+0 به یه ن


دوکتور جئری یازیر کی اؤلوم ملئیکه سی چیراغ کئچیردن عزراییل سؤیله ییبدیر کی ایراندا تورکلر اؤز دوغما آنا دیللرین اوخویاجاقلار آنجاق من گؤرمه یه جاغام. بونو دئرکنده ائله بیل دویغولانیب آغلاییب سئل کیمی گؤز یاشی آخیدیبدیر. بو ایروایته اینانماییب ایسته دیم کی عزراییلدان بو اولایین دوز اولوب اولماماغین سوروشوب بیلیم. ترس آوا تنگه سینده ویرنیخیب دولاشارکن ائشیتدیم کی دیل باغلاییب طیلیسیمه سالان جادی جنبل باشچیسی قولام جان اوسته دیر. عزراییلین اوردا اولماسین کسین بیلیب دابانا قووات قولامین ائوینه قاچدیم. تووشیه تووشیه تر توکرکن ائوین قاپیسیندان ایچرییه گیریب اوردا اولان قولامین قوهوم اقرباسینا سالام وئریب قولام یاتان اوتاغین قاپیسینا باخاندا گؤردوم عزراییل قوللارین چیرمالییب الینده اؤلوم ایپی ایسته ییر اوتاغین قاپیسین آچسین. دالیدان الیمی چیگینینه قویوب سالام کئف احوال ائدندن سونرا دئدیم:

باغیشلا عزرائیل جان! ایشیوا قولپ  قویورام آنجاق دئییشلره گوره سن ....

سؤزومو کسیب دئدی: قوی بو کیشینین ایشین قورتاریم اجل واقتی کئچر قولامین دا  جین آتی کیمین اؤلوم قوپئنی یانار یئردن قالخار بیرده اوستن امر آلینجا باشیزا قالمایان اویونو گتیرر.

بو سؤزو ائشیدنده دالی دالی چکیلیب دئدیم:

یوخ آماندی تئز ایشیوی گؤر، قویما بو  یئردن قالخسین!

عزراییل اوتاغا کئچنده، من ده فیکر دوشونجه ایچینده الیمی اوووشدورا اوووشدورا قاپیدا او باشا بو باشا گئدیردیم. عزراییلین اوتاغا گیریب چیخماسی گئجیکرکن ناگیران اولوب قاپینی آرالاییب ایچری باخاندا عاغلیما گلمز بیر اولای  گؤردوم. عزراییل ایپی قولامین  بوینونا سالیب آنجاق قولام دا اؤنجه دن حاضیرلادیغی بیر کندیری عزراییلین بوینونا دولاندیرمیشدی،  بیر بیرلرین بوغماغا چالیشیردیرلار. بو آرادا عزراییلین دورومو آغیر گؤرونوردو و نفس آلماقدا زورلوق چکیردی. رنگی قاپ قارا اؤلموشدو و دیلی ده ائشیگه چیخمیشدی. اؤز اؤزومه دئدیم:

عزراییل اؤلسه، بیز اینسانلار اؤلمه یه جاغیق، قوی بو اؤلوم ملئیکه سی اؤلسون قوتارسین!

سونرا دئدیم: عزراییل اؤلسه، قولام دیری قالاجاق. عزراییل بیر دؤنه جان آلسا، بو عیبه جر مین دؤنه اؤلدورور.

زامان یوخ ایدی. هر آن اولاسی ایدی قولامین قورقوهوملاری گله، قارار وئردیم عزراییلا یاردیم ائله یم. هر نه اولسا دا اوجا تانرینین امریندن باشقا بیر ایش گؤرمور آنجاق قولامین ایشلری تانری وئرن دیلی باغلاماقدان توتدو تا تانری وئرن چؤرگی کسمکدیر. یا آلله دئییب یاپیشدیم ایپین اوجوندان. عزرائیل او باشدان من بو باشدان ایپی چکدیک تا ایش تاماملاندیر.

 اؤلومدن دؤنن عزراییل بوینومو قوجاقلاییب اوز گؤزومدن اؤپوب دئدی: سن منی اؤلومدن قوتاردین! ایندی دئه گؤروم سنه نه ایش گؤره بیلرم؟

دئدیم: والله گلمیشدیم  دئیه م الینده کی ایپی سال پیس آداملارین باشینا قوی بیزده گونه چیخاق سنده! آلله بول بول توکدو باشیمیزا بونلار الیمیزدن آلدیلار. دیل وئردی دانیشاق حاققیمیزی ایسته یک، بونلار باغلادیلار. آنجاق سن  لاپ اومودومو کسدین!

دئدی نیه؟


دئدیم: کیشی سنین بیر چوروک قولاما  گوجون چاتمیردی. من اولماسایدیم ایندی اونون یئرینده سن اوزانمیشدین!


اؤرکله نیب آغلایارکن دئدی: دوزون بیلمک ایسته سن، ایندی یه کیمی بیر بئله اینسان جانی آلمیشام، بوجور چاراسیز قالمامیشدیم. قورخورام شیطان کیمی آللهین امریندن چیخام جنتدن  ائشیگه سالا، یوخسا بو طایفانی اؤلدورمه یه گئتمه رم. بئله گئتسه منیمده اؤلوموم بونلارین الی ایله اولاجاق!

 یازار: هاماش خانکیشیلی






یوخسولون قیسمتی کؤتکدی

یازار : هاماش

+0 به یه ن
اوجورکو بیلیرسیز و دوکتور جئری قزئتینده یازیب، منیم داییم، قالایچی مورتوض، تزه لیکده آخیرت سفریندن دونوب و ایلک آدام اولاراق نکیری مونکری زیارت ائله ییب و اولاردان بیر ائششک حئسابین وئرمک اوچون دویونجا کؤتک یئیندن سونرا دارماداغین بو دونیایا قاییدیب. داییم اولدوغونا گورا منیمده بوینومدا بیر آغیر یوک وار. هر نه جور اولسا جان جیار ساییلیریق.  گئدیب اونو یوخلاماق منیم بورجومدور. دونن بیرآز یئر یئیینتی آلیب قالایچی دایینین ائوینه دوغرو یولا دوشدوم. یئتیشدیم الیمی باسدیم قاپینین زیلینه، های وئرن اولمادی، قاپینی بیر آز تاپدالایاندان سونرا، قالایچی دایینین حیات یولداشی قاپینین دالیسیندا های باسدی :آماندی قاپینی سیندیرما گلدیم! یازیق دایی دوستوم دئیینه دئیینه قاپینی آچیب اییلمیش بئلین دوزه لدیب باشین قوزاییب اؤزومه باخاندا، سالام دئدیم کئفین سوروشاندا قهرله نیب آغلایا آغلایا دئدی : آی بالا!آللاه اینسانین عاغلین آلینجا جانین آلسین بیر یوللوق قورتارسین! سنین بو یوخسول داییوین آروادی اولاندان گون اوزونه حسرت قالدیم. اؤره کدن بیر آه چکیب علاوه ائله دی : اوجا بویوم بو قاپیدا بوکولدو،گؤزللیگیم، صاخات بدنیم الیمدن گئتدی، ایندی ده قوجا واختیندا دوشوب یورقان دوشه گه، آلتین اوستون تمیزله مک منه قالیب. اوخ  اوخ! قیچیم سیناردی بو ائوه گلین گلنده! اؤزگه اوغلونون یولوندا اؤزوموچوروتدوم. دونوب ائوه ساری گئدنده، منده دالیسیجا یاواش یاواش آددیملایا آددیملایا دایی دوستونون غمین کدرین یونگوللتمک آماجیلا  دئدیم :دایی دوستو! اوستاد شهریار رحمتلیک دئییر:«  آخیرتی اولانلارین دونیاسی غمسیز اولماییب.» سنین بو زحمتلرین هئچه گئتمز. بو دونیان اولماسادا او دونیادا یئرین بهشتین لاپ اورتاسیندا اولاجاق. اؤزوده آللاه  سنی بهشتین ان گؤزل حوریسی ائلراینشاالله! ائله قالایچی دایینیندا بو دونیادا نه چیله لر چکدیگین بیر آللاه بیلیر. اودا قیلمان اولار، بو دونیانین یئرینه او دونیادا آی یاشارسیز هااا. دایی دوستوم بو سؤزلری ائشیدنده آیاق ساخلاییب اللرین بئلینه قویوب دونوب اؤزومه ایری ایری باخاندا دئدی: بالا هاماش! من ائشیتمیشم کاسیبین نه بو دونیاسی وار نه او دونیاسی. نه حوری سی؟ نه قیلمانی؟ یئنه منی دئسن یاراشاندی، قالایچی موتوضدان قلمان اولار؟ هله او دونیانین قاپیسیندان باخیب،سنده باغیشلا اوراسینا کاسوو سالیب گؤندریبلر باشیما. باشین توولاییب آیاغیندا کی ترلیکلری قاپینین آغزیندا چیخاردیب ایچری یه گئچنده منده اونون تفلیک ائتمه سیله آیاق قابیلاریمی چیغاردیب  ایچریه گئچنده، قالایچی داییمین سیزیلتیسن اوتاغیندان ائشیدنده اوتاغا گئچیب داییمین دارما داغین اولموش دورموون یورقان دوشک ایچینده گؤرنده اؤزومو توتا بیلمه ییب اؤره کله نیب آغلادیم. قالایچی داییدا سیزیلدایا سیزیلدایا بارماغینین اوجینن منی اؤز یانینا چاغیردی. گئدیب یانیندا اوتوروب الین الیمه آلیب نه تهر سن؟ دئینده، چوخ قورخموش آداملار کیمی گؤزلرین بره لدیب قاشین یوخ نیشانه سیله اوسته ترپدنده، حالینین یامان اولدوغون منه گؤستردی. آخی بیلیرسیز! کیشینین قورخوسوندان دیلی توتولوپ و هئچ اولماسا دانیشیب اؤرگینده بوشالدا بیلمیر. هر حالدا بیر آزحال احوال سوروشاندان سونرا قالایچی دایی قاش گؤزنن جاوابلادی، سورا گؤردوم بارماغینان گؤبکدن آشاغینی گؤستریر باشا دوشمه یینجه، دایی دوستومو چاغیریب دورومو بیلیندیرینده گؤردوم دایی دوستومون قاش قاباغی ساللاندی اؤز اؤزونه دئیینیب یامان یووزدئمه یه  باشلاییب آخسایا آخسایا گئدیب بیر لگنله آفتافا گتیرنده، ایشی آنلادیم. اؤز اؤزومه دئدیم:  داییم اوتانار٬ دوردوم یولا دوشم، دایی دوستوم دئدی :من اوتوروب دورا بیلمیرم، قولوم قیچیم آغرییر،سن جاوانسان، بو گون دایی جانیوین زحمتی سنله اولسون!  دئمه لی من یازیغین قدرینده قالایچی دایینین یانین یوماقدا وارایمیش. داخی بو باره دانیشماغیم گلمیر هئچ سیزده سوروشمایین! بیر تک بونو دئمه لی یم کی داییم یئردن دورونجا دایی دوستوم بو آفتافا لگن ایشین منه تاپشیریب. چونکو دایی دوستوم دئییر: آخیرتی اولانلارین دونیاسی غمسیز اولماییب! دئییر او دونیادا قیلمان اولماق ایسته سن، بو دونیادا دایی جانیوین یانین یومالیسان!! بو تجریبه دن سونرا من بیر درین فیکره دوشمیشم. دئییرم ایشه باخ! شیخ جنابلارینین تؤره مه سی یئسینلر پارتدامایینجا دویماسینلار، قالایچی مورتوضدا بیر تیکه چؤرک تاپماق اوچون قبیرده یاتیب باشقاسینین یئرینه نکیری مونکرین جاوابین وئرمک زوروندا قالسین، اولاردا اونوبیر ائششگه یوک چاتیب هردن بیر مینمک اوچون ویریب یورقان دؤشه یه سالسینلار. خالقین دایی سیندان پولدان مالدان قالاندا، منه ده داییمین یانین یوماق قالسین!  ایسته ییرم ده دردیمی سؤیله یم شیخ جنابلاری دئییر:قیسمتدن آرتیق یئمک اولماز!!




ایتی کوشکوره ن اولماسا جومماز

یازار : هاماش

+0 به یه ن
ائشیدیبسیز دئیرلر"فلان آدام ایت کیمی قورخاقدیر". آتا بابامیز هئچ سؤزو بوشونا سؤیله مه ییبلر. اصلینده ائله ایت چوخ قورخاق حئیواندی آنجاق آدام اوستونه جومان ایتلر بیر باشقا اینسانلار الینده بسله نن ایتلردیلر. اوستاد شهریارین بیر سؤزی وار بویورورکی: ایتیمیز قورد اولالی، بیزده قاییتدیق قویون اولدوق   ایت ایله قول- بویون اولدوق.  اینسان اوستونه جومان ایت هئچ شوبهه سیز باشقا اینسانلارلا قول بویون اولان ایتلردندی. میثال ایچون بیر دوولتلی نین یازدیغیندا یئییب قودوروب و یا بیر چوبانین یانیندا اتدن کوتدن یئییب هارینلایان بیر کؤپکدی. دئمه لی ایتله قول بویون اولان اینسانلار او ایتلره اؤرک وئریرلر. گؤروبسوز یییه سیز ایتلر یول قیراقلاریندا زیر زیبیل توکولموش یئرلرده سوله نرلر و اینسان گؤرنده یا قاچیب گیزله نرلر و یا قویروقلارین بوللایارلار آنجاق اینسان الینده بسله نن ایتلر بیر باشقاسین گؤرنده ییرتماق قصدیله جومارلار. ایتی کوشکوره ن آدام اولماسا، اینسان اوستونه جومماق جساراتی اوندا اولماز.




عاغیل پایلاناندا کیملره یئتیشمه ییب؟

یازار : هاماش

+0 به یه ن

بیچین واختی غیبالی ایله گنجالی بیچین بیچنده غیبالی  اوزدن ایراق ائششگینده زمینین قیراغیندا باغلامیشدی. شیرین شیرین دانیشیقلارین آراسیندا گنجالینین گؤزو غیبالی نین قولاقلاری ساللانمیش ائششگینه ساتاشاندا دئدی: غیبالی! بو ائششگی سات گئتسین، قوجالیب الدن دوشوب. غیبالی قاش قاباغین ساللاییب دونبالدی بوغدالاری اوراقلایا اوراقلایا دئدی : بو حئیوانی ساتمارام بونون گؤزلری رحمتلیک قاغامین گؤزلرینه اوخشاییر. کیشی نین گؤزلری دولدو بیرده سؤیله دی: اونو گؤرنده قاغام یادیما دوشور. اویاندا زمی صاحابی بو سؤزلری ائشیدنده باشین توولاییب بونلارا دئدی: گؤره سن  آللاه عاغیل پایلایاندا  سیز هاردا ایمیشسیز؟ غیبالی اربابین سؤزون جاوابسیز قویماییب گنجالیه دئدی: گنجالی! عاغیل پایلانان ایلی بیز هاردا ایدیق؟ اودا بیر درین فیکره جوموب سورا دئدی: غیبالی! یوزه یوز بیز او خاراب قالمیش گون چیخماز کندینده اولان ایلی بو عاغیل پایلاما ایشی اولوب! اورانین یول یولاغی داش قایا اولدوغونا گورا اورا گلیب چیخان اولماییب.

من بئله بو گونلر چوخ ایسته ییرم بو غیبالی دان گنجالیدان بیرین گؤرم، بیر سؤروشام گؤرم گون چیخماز کندینده بولارلا بیرگه او ایل کیملر وار ایمیش؟ منه قالسا من دئییرم او ایل اوردا چوخ آدام وار ایمیش.

هاماش خانکیشیلی





آللاه ائله سین، جاناوار گلسین هامینی یئسین تک آغام قالسین!

یازار : هاماش

+0 به یه ن

نمنه قوروم قونشو وار هامیسیندان دویموشوق. باتی اؤلکه سیندن ده لاپ زهله میز گئدیر. ائله اونا گؤره ده اروسلار،دینسیز چین دوولتی، قوزئی کوره ایله  ال اله وئرمیشیک آللاه دئیه ن اولسا هامینی وئرک قوردا. ائله کی جاناوار گلدی هامینی یئدی تک آغام قالدی، دده وای نه کئف ائله یه جه ییک. بوتون اورتا دوغو بیزه قالاجاق. نویید دن قازدان بوللو سوللو ساتیب خشله یه جه ییک. مککه کربلا بوتون بیزیم اولاجاق. پول جیبیمیزی جیراجاق. فهدین قیزیلدان اولان ایاق یولوسونا اجی ائلیه جاغیق. آلله! بو اروسو چینی، همیده قوزئی کوره قودوغون بیزه چوخ گورمه.!هئچواخت بیر بئله آرزیلاریما یاخینلاشمامیشدیم.گئجه یوخومدا گؤردوم دوبئی یین قباله سین منیم آدیما ویردیلار. ینی سیزین آنلادیغینیز امیر دوبئی  اولدوم. غم غوصصه یئمه یین هاا ائله سیزه ده من جان یئتیشه جک. قوتاران دگیل کی بوتون اورتا دوغو بیزیم اولاجاق. ساغلیق اولسا بو گوج کی بیزده وار اورتا دوغویا یییه دوراندان سونرا بوتون دونیانیدا اؤز آرامیزدا بولوشدیره جه ییک.





خان کیشیلی اوتاندی بوزوقلو نون دیلی اوزاندی

یازار : هاماش

+0 به یه ن

بیزیم بو کتده آلماس بگین بیر قفه سی وار. قدیم زامانلار باشیم آییند اولاندا اورا چوخ گئدردیم. قفه ده آشیق یحیا ساز چالاردی، کالبای طومار گؤزل گؤزل ماهنیلار اوخوردو. من ده ائله قدیمدن دده بابادان قالما بیر شعر کیتابیم وار، آشیق یحیا چالاردی، منده یاخشی شعرلر اوخویوب آلقیش آلاردیم. آنجاق سون زامانلاردا آشیق یحیا و کالبای طومار دا قفه یه آز گئدیردیرلر. منیم ده ائله باشیم باغدا زمیده و یا مال حئیوانا باخماق ایله بند اولدوغونا گورا قفه یه چوخ واخت اولاردی کی گئتمه میشدیم. دونن ایشلری یئر به یئر ائله یندن سونرا باشیم بیر آز آچیلدی، کیتابی گؤتوروب قفه یه ساری یولا دوشدوم. قفه یه گیریب جاماعاتا سالام وئریب اگلشدیم. آنجاق تعججوبله گؤردوم قفه ده اوتورانلار اوجا سسله بوزوقلو دیلی دانیشیرلار. چوخ باخدیم گوروم بلکه باشقا بیر قفه یه گلمیشم، دئدیم قوجالیقدی دا، آدام بو یاشدا چوخ چاش باش ویرار! گؤردوم یوخ ائله دوز گلمیشم آداملار همان آداملاردی آنجاق اوچ باشدا بوزوقلولاردان اگله شیبلر. آشیق یحیاینان کالبای طوماردا یوخ ایدیلر. بیر قلیان ایسته دیم آلماس قفه چی قلیانی گتیردی. قلیانی چکه چکه اوردا اوتورانلاری سایدیم گؤردوم اوتوز باش خان کیشیلی دیر، اوچ باش بوزوقلو.  دئمه لی اوتوز باش خان کیشیلی اوچ باش بوزوقلو باشا دوشسون دئیه، بوزوقلو دیلی دانیشیردیلار. زبوللا کیشی بوزوقلو دیلین بیلمیردی آنجاق اونو دانیشماغا ائله گوج وئریردی کی لاپ آز قالیردی پیس یئری پارتلاسین. زبوللا بوزوقلولارین بیریندن ایسته دی کی مجلیسده شنلیک اولسون دئیه بیر آغیز اوخوسون. اودا باشدادی او توتولموش سسیله بیر بوزوقلو هاواسی اوخودو. زبوللا و اوردا اوتورانلارین چوخو به به دئییب ال چالماقدان دورموردولار. بوزوقلونون ایفاسی قورتاراندان سورا منده اگلشنلردن ایجازه ایسته دیم کی خانکیشی طایفاسینین ان اؤنملی آدلی سانلی شاعیریندن بیرشعر اوخویام. شعری باشلایاندا گؤزوم بوزوقلولارا ساتاشدی گؤردوم آغیز بورونلارین اگیب دوداق آلتی میرتدانیرلار، من شعراوخوماغا دوام ائله دیم آنجاق منی اوچ دورد آدام آلقیشلاییردیرلار و زبوللا دا ایسالا دوشوب سانجیلان آداملارکیمی یئرینده تئز تئز یانین دگیشدیریردی. آخیردادا شعری یارییا یئتیرمه میشدیم کی منه ایشارت ائله دی کی شعر اوخوماغی دایاندیریب اگله شم یادا بوزوقلو دیلینده اولان شعرلردن اوخویام.

دئدیم: زبوللاایکی ساعاتدی بوزوقلو دیلینده دانیشیب اوخویوبلار، قوی بئش   دیقه ده خانکیشی دیلی شعری اوخویاق، باخ الان سولدوزنان میصیر بوزوقلو دیلین باشا دوشمه دیکلرینه گؤره ایکی ساعاتدی سیزین دوداقلاریزین ترپشمه سینه یاخیرام. زبوللا هیرسله نیب منه دئدی کی خانکیشی دیلی باشگوت ماحالیندا یاساقلانیب، بیلمیرسن؟ دئدیم آللاه وئرن دیلی هانسی بنده نین حاققی وار یاساقلاسین؟ بوزوقلولاردا دیله گلیب زبولا نی دستکله ییب دئدیلر شعره دوام ائتسن بیز قفه دن گئده جه ییک. من دئدیم: هئچ کیم سیزی بوردا زورلا ساخلاماییب! بو سؤزو دئیه نده زبوللا یوگوردو منیم الیمدن کیتابی آلسین. اوچ دورت آدام خانکیشیلی ده دیللری توتار توتماز دئییردیلر: قارداش! بو کیشی ایللر بویو بو قفه ده شعر اوخویوب نه اولوبکو؟ آنجاق ائله اولاردا آرا قاریشاندان سورا منه دئدیلر : کیتابینی گؤتور گئت قوی قال ماقال یاتسین! آنجاق منی بیر زاد چوخ یاندیردی، بوزوقلو دیلیندن هئچ زاد بیلمه ین میصیرده منی دانناقلاییردی. و اونا گؤره ده زبوللا جسارتله نیب منه یاخینلاشیب شعر کیتابین الیمدن چکیشدیردی. کیتابی وئرمه یینجه، بیر ایکی آداملا بیرلیکده منی قفه دن ائشیگه سالدیلار. قاپیدان چیخاندا دالی دؤنوب باخاندا گؤردوم بوزوقلولار قفه نین دایاناجاقلارینا سؤیکه نیب منه باخیب قله قاه چکیب گولورلر.


ایندی منی خان کیشی قه فه سینه قویموللار دئییرم گؤره سن بوزوقلو قه فه سینه گئتسم منده اوردا زبوللا کیمی بیر یاریم پالان سوپا تاپا بیللم منی یوخاری باشدا اوتوردا قولتوغومون آلتینا یاسدیق قویا، شعر اوخویام بوزوقلی لار ال چالالار؟

 


آردینی اوخو


بوزوخلو دیلی

یازار : هاماش

+0 به یه ن

 بؤیوک بابام دئیردی بوزوقلولار بیزیم کنده پناه گتیرنده دانیشماق بیلمزدیلر، من اینانمازدیم. منده ده گوناه یوخ ایدی، بئش اون دنا یئکه کیتاب گؤستریردیرلر دئییردیلر:گویا او کیتابلاری آتا بابالاری یازیبلار! سونرالار بونلارین چوخ غریبه ایدداعالارین گؤرندن سونرا دئدیم اولمایا بونلارین ائله دیللریده باشقا زادلاری کیمی اوردان بوردان بورج آلینیب!  چوخ سوروش گؤروش آپاراندان سونرا گؤردوم بؤیوک بابام حاقلی ایمیش. بونلارین بیزیم دیلی اؤیرنمه باجاریقلاری اولمادیغینا گؤره، بیزیم کاتدالاریمیز بونلارا بیر آسات دیل اؤیرتمک زوروندا قالیبلار کی هله لیک عمللرین آشیرسینلار آنجاق اونودا اویرنمه یه قئیرت گؤسترمه ییب آیرانلی آش کیمی اوردان بوردان قاتیشمیش بیر دیلچک اؤیره نیبلر.





بئچیخار اولاد

یازار : هاماش

+0 به یه ن
گ بؤیوک دده م دوزدو مندن خوشو گلمزدی آنجاق دوغرو دانیشساق، کارلی باشلی آدام ایدی. آتامین آتاسی دئیردی: فراساتلی  آدامین ندنسه ائولادلاری چیخارسیز اولار! او بیلردی کیمه سایغی گؤسترسین کیمی خوش دیندیرسین، کیمه سالام وئرسین، کیمی هنده وره قویماسین سؤزون قیسساسی کیمینله یولداش اولسون کیمینله یوخ. ائله اونا گؤره ده ایسته یه نی ده چوخ ایدی، ایسته مه ینی ده.  کندیمیزین بیر بوزوقلیو طایفاسی وار ائله بو عارسیزلار کیمی اونلاردا  یئردن گؤیدن دانیشارلار آنجاق عمله گلنده اللریندن بئش قیرانلیق ایش گلمز، آنجاق نیه آرا قاریشدیرماقدا لاپ اوستادیلار. ایرحمتلیک دئیردی: آدامین بیر کوت دهره سی اولا، بونلار دانیشاندا آغیزلارینا آغیزلارینا چیرپا. بولاردا ائله حئساب اللرینه گلمیشدی چوخ بیزیم عائیله نین هنده ورینه دولانمازدیلار.  بؤیوک آتام ائلیمیزین بؤیوک هامپالاریندان ایدی، مولکه دارایدی،باغ باغات ،حشم ،مال ،قارا هرزاد دویونجا وار ایدی. ایل بایرامیندا بوتون ائلین اوشاقلارینا یومورتا بویاتدیریب پایلاردی جیبلرین چرشنبه یئمیشیله دولدوراردی. باغ واختی مویوه سیندن، خیرمان واختی آرپا بوغدا دوگوسوندن هامینین ائوینه پای گؤندرردی. بوتون خئیر ایشلرین، احسانلارین بانیسی اولاردی. بؤیوک آتام اؤلندن سونرا بیر بئله مال وارلیق آتاملاعمیمه قالدی. آتامنان عمیم هم قارداش ایدیلر هم یولداش. بونلار هامیلا دوستلوق اولسون دئیه عارسیز طایفاسی یوخ باغیشلایین بوزوقلو طایفاسیلا یاخینلاشیب اولارنان یولداشلیق موناسیبتینه گیردیلر. بیلیرسیز دا کوسه نلر باریشاندا بتر قوجاقلاشارلار! او چاغا کیمی هئچ کیم آتامدان عمیمه و یا عمیمدن آتاما بیر سؤز دئیه بیلمزدی آنجاق بوزوقلو لار هم آرا قاریشدیرما اوستاسی ایدیلر همده یئنی یولداش، و بوندان یارارلاناراق ائله لاپ ایلک آندان اؤز ایشلرینه باشلامیشدیلار. ائله هردن شوخلوغا سالیب بیر آرا قاریشدیران سؤز آتاردیلار سونرا شوخلوق ائله دیکلرین سویلردیلر آنجاق ائله بو شوخلوقلار ایشین گؤرمه گه باشلامیشدی. گئت به گئت آتاملا عمیمین آراسی پوزولماغا باشلامیشدی. آخیردا دا بیر گون گؤردوم باغدا آتامنان عمیمین سسی قوزانیب گؤیه. قاچیب آتامی چکیب بیر یانا سؤیله دیم :آتا جریان نه دی؟ دئدی: باغی بولنده منیم باشیما بؤرک گئچیب! دئدیم او واخت دئییردین ایکیسی ده بیردی، ایندی نه اولدی ؟ منه بیر گؤز آغارتماسی گلدی سسیمی کسدیم. اوگوندن بو یاناهئچ زاد سؤزه ال اله قالخدیلار. هر بیر داوادان سورادا بوزوقلو طایفاسیندان اولان دوستلاریلا درتله شیردیلر! ائله اولدو کی آتام آتاسیندان قالان حیطدن اؤز پایین بوزوقلو طایفاسینا ساتدی، نیه کی ایسته میردی زهلم گئتمیش قارداشینین اوزون گؤرسون. عمی ده اونون آجیغینا باغدان اولان پایین ساتدی بوزوقلو طایفاسینا.  ایندی بیر یول بوزوقلولار گرچک اوزلرین گؤسترمه گه باشلادیلار. چوخ زامان گئچمه دی کی گؤردوم آتام ائله کئفسیزدیرلاپ آز قالیراؤرگی پارتلاسین. دئدیم نه اولوب؟ دئدی : عمیوین باغین آلان بوزوقلو کؤپگ اوغلو گونده باغین مرسین قاریشدیریر. بوگون سؤزوموز چیخیب ساواشمیشیق. ئییرر باغین بوتونو بیزیمدی! دئیرم سنه هاردان گلیب؟ دئییر او واخت آتان آتامی زورلاییب. بویاندان سحر خبر گلدی کی عمیم قونشوسوایله بوغوشوبب. آتام منی گؤندردی گئدیم گؤروم نه خبر وار؟ عمیم منی گورنده دئدی: آی گؤروم او مردم آزار آتاوین بئلی سینسین!  منی ائله آداملا قونشو ائله دی کی هله چکمه لی یم. اونوندا ائوینین دوواریاوچولموشدیو، سانکی اونون دا بوزوقلو دوستو دووارین لاپ دیبیندن قویو قازیرمیش. اودا ائوه قورقوشوملو قباله چیخادیردی .
دئدیم عمی ایرحمتلیک بؤیوک آتام بیرزاد بیلیرمیش ها بو جاناوارلاری هنده وره قویمورموش!!
باشین سالیب آشاغی هئچ سؤز دئمه دی.




پانتورک دده م

یازار : هاماش

+0 به یه ن

 آللاه اؤلنلریزی باغیشلاسین، منیم  دده م(بؤیوک آتام) لاپ زر پاتنورک ایدی، بیر یول گؤرمه دیم کیشی نین آغزیندان بیر"آذری" سؤزو چیخسین. ائله بئش سؤزون باشیندا بیر "تورک سؤزو" یا تورکون مثلی عیبارتی ایشله دردی. دانیشاندا ائله سؤزلر ایشله در دیر کی ایندی کی نسیل اونلارین اوندا بیرین باشا دوشمزلر ینی گرگ فارسجایا چئویره سن تا بو یازیق بئساواتلار باشا دوشه لر. میثال اوچون زیر سیگاریه کول قابی دئیردی صوبحانه یه قلیان آلتی نه بیلیم بوخارییه پینج و ها بئله داا. ایندی گورورم او کیشی لاپ ائله بو چاغین پانتورکلرینه تای ایمیش! ایرحمتلیک اولمه سه یدی ایندی گونو زیندانلاردا کئچیردی.